...

 კომპანია BMW-მა კუპის პროტოტიპის ოფიციალური ფოტოსურათები გამოაქვეყნა, რომლის დებიუტი სექტემბრის ბოლოს პარიზის ავტოსალონზე შედგება.
კონცეპტ-ქარის იერსახეზე BMW-ის ახალმა შეფ-დიზაინერმა ადრიანა ვან ჰოიდინკმა იზრუნა და მართალია ის გარკვეულწილად, ახალ 5-Series-ს წააგავს, უფრო დინამიურად და ელეგანტურად გამოიყურება. პროტოტიპი მთლიანად დიოდური სანათებითაა წარმოდგენილი და სავარაუდოდ, სერიული სპორტკუპეს რჩეულ ვერსიებს სწორედ ამ ტიპის შუქფარებით აღჭურვავენ.
ახალ BMW 6-Series-ზე უკანა ამძრავი შენარჩუნდება. ის 6 და 8-ცილინდრიანი ტურბო-ძრავებით აღიჭურვება. ავტომობილის გაბარიტული სიგრძე 4820 მმ, სიგანე - 1855, სიმაღლე კი 1375 მმ იქნება. მისი საბარგულის მოცულობა 450 ლ-ს შეადგენს. ახალმა სპორტკუპემ მოდერნიზებული მილტიმედიური კომპლექსი iDrive მიიღო, რომელსაც 10-დიუმიანი დისპლეი აქვს.
როდის იხილავს დღის სინათლეს ავტომობილის სერიული ვერსია, ჯერჯერობით უცნობია.